OCCITAN. UNA LENGA DA SONAR, DANÇAR E CHANTAR

La descuberta de la lenga occitana dins las Valadas a portat, a partir dai ans ‘80, decò a prepausar las vielhas musicas e danças tradicionalas presentaas en clau nòva, gràcia decò a l’introduccion, vesin ai tradicionals instruments coma violons, armònis, semitons e violas, d’instruments nòus coma la bateria, la guitarra e la bassa elèctrica. Tot aquò a permés d’un caire de “salvar” las musicas, las chançons e las danças que semelhavon esquasi mòrtas, e de l’autre caire de agrandir lo pùblic enteressats, en avisinant sortós tanti joves a la scèna locala. Aquest reviscolament  fai part de la corrent musicala dal folk revival.

La Val Estura conta decò grops ben important per la scèna musicala occitana.

Lou Seriol

Lo grop mai renomat de la Val Estura son segurament li Lou Seriol, naissut dins lo 1992 a Aison, sùbit emb una formacion acustica (semiton, galobet, votz), per apres passar dins li ans a emplegar instruments pas tròp “tradicionals” (congas, guitarra e bassa elèctrica), en tacant una experimentacion que a portat a mesclar ensem lo rock, lo punk, lo ska e lo reggae.

Dins lo 2000 suert lo lor primier album Persi Pien que romp emb la scèna musicala occitana classica dal tèmp eslançant parier li Lou Seriol a sonar dins l’Italia e la França.

Dins lo 2005 vèn publicat lo lor second album Reviori, emb emportantas participacions: Papet J, votz e fondator dai Massilia Sound System, Lois Pastorilli, votz e fondator dai Nux Vomica, Sergio Berardo e Dino Tron dai Lou Dalfin e Fabrizio Simondi dal còr L’Escabot.

Dins lo 2009 suert l’album enregistrat dal viu Ambe Vos a l’Hiroshima Mon Amour de Turin e a l’Ex Officine Bertello de Lo Borg San Dalmatz (CN) emb las traças mai renomaas dal grop e quarquas traças nòvas, coma lo Se Chanta, l’imne occitan.

Dins lo 2012 arriba Màquina Enfernala, un concèpt album dedicat as tematicas d’encui: television, immigracion, ecc… que mòstra un son mai maür e emb una major experimentacion sia a nivèl das tematicas que a nivèl musical.

Enfin dins lo 2018 suert lo darrier trabalh Occitan caracterizat da dotze nòvas traças, emb una cover da la chançon Anarchy in the Uk dai Sex Pistols, adaptaa a la musica occitana, per li 40 ans de la scèna punk e li 25 ans dai Lou Seriol.

La Mesquia

La Mesquia cèrca d’èsser en linha emb la tradicion en gardant la lenga, las musicas e li instruments tradicionals.

Dins lo 2011 suert lo primier trabalh En l’aire ailamont, liat a la tradicion occitana, inspirat a la vita vivua das personas das valadas, dai sovernirs, dai chambiaments dal païsatge e da l’estòria, da la recèrca, da l’amor, da la consideracion de quarqui moments de vita.

Dins lo 2013 suert lo second trabalh Podre, que a conoissut tantas recensions importantas dins lo sector musical, vista la façon de menar l’estòria musical e linguistica dal grop envèrs la produccion d’una nòva musica.

Enfin dins lo 2019 arriba lo darrier trabalh L’àrbol, emb Elena Ledda e Chiara Cesano e lo  primier espectacle teatral de La Mesquia realizat emb l’actor Luca Occelli dal títol Alberi, Asini, Uomini e Donne.

Lhi Destartaveleà

Li dion “Lhi Destartavelà”, amon se far conduire per la musica e pensar a rèn d’autre. Lhi Destartavelà son naissuts “oficialament” a lui dal 2008. Se son conoissuts gràcias as leiçons e ai recitaus organizats per Sergio Berardo, Simonetta Baudino e Simone Lombardo. Partatjon la vuèlha e lo plaser de sonar la musica tradicionala occitana, emb quarquas composicion personala, emplegand li instruments de la tradicion – semiton, viola, flutas, galobet, piva – mesclats emb instruments “moderns” coma la bassa electrica e lo cajon.