OCCITAN. GUICHET LINGUISTIC

Dal 2004 lo guichet linguistic de l’Unione Montana Valle Stura de Demont s’acupa de desvelopar nombrósas iniciativas de valorizacion dal patrimòni linguistic occitan, gràcias a li financiaments de la Lei n. 482 dal 1999 (“Norme in materia di tutela delle minoranze linguistiche storiche”) que para “le lingue e le culture delle popolazioni albanesi, catalane, germaniche, greche, slovene e croate e di quelle parlanti il francese, il franco-provenzale, il friulano, il ladino, l'occitano e il sardo”.

Talas iniciativas an favorit la promocion e la difusion de l’occitan e l’avesinament da la populacion a la cultura e a las tradicions liaas a la lenga de minorança e se son dabanaas, en particular, en collaboracion emb las escòlas de la valada e lo Dipartimento di Studi Umanistici dell’Università degli Studi di Torino (redaccion de l’Atlante Linguistico ed Etnografico del Piemonte Occidentale e redaccion de l’Atlante Toponomastico del Piemonte Montano – ATPM).

La collaboracion emb l’ATPM a portat a la pubblicacion de 9 volums dedicats as recercas toponomasticas dins las comunas de: lo Borg San Dalmatz, Gaiòla, Aison, la Ròca, Demont, Ritana, Valauria, Moiòla e lo Sambuc; son per fenir decò li trabalhs de l’Argentièra, Peirapuèrc e Vinheul. Dins lo 2021 encomençaran decò las enquistas dins la darrièra comuna: Vinai.

Es en tren decò la revision de la Grammatica Occitana de l’auta Val Estura, realizaa emb tuchi li materials de las entrevistas fachas dai recercaires e dai collaborators de lo guichet linguistic.

Per aquò que regarda las activitats emb las escòlas das comunas que an participat ai projèctes de valorizacion de la lenga e de la cultura occitana de l’Unione Montana Valle Stura se pòl remarcar:

- “Storie d’Oc”, laboratòris de lectura e narracion sus las tradicions occitanas pensats da Caterina Ramonda, expèrta de literatura e promocion de la lectura per l’enfança, que s’acupa decò de recerca sus sa lenga, l’occitan, e sus sias tradicions oralas e escrichas. Caterina a revirat en occitan alpin La capra del signor Seguin di Daudet, surtit dins lo 2016 per Egnatia emb li dessenhs de Stefania Vincenzi, e a rescrich lo conte Catalina e l’ase, dessenhat da Marco Bailone (Egnatia 2017);

- leiçon-concèrt de La Mesquia per promòure e valorizar la conoissènça dal patrimòni linguistic-cultural liat a la musica, al chant e a l’expression en lenga occitana.

Lo guichet linguistic a decò activat, dins lo 2020, sus la pagina Facebook de l’Unione Montana Valle Stura, una rubrica dedicaa al monde de la lenga occitana locala: Sounjar (dal diccionari provençal-francés “Lou Tresor dou Felibrige” de Frédéric Mistral: pensar/reflechir; pantaisar). La rubrica realizaa emb la collaboracion de Andrea Celauro, originari de la Val Estura, laureat en Antropologia Culturale ed Etnologia emb una especializacion en Antropologia alpina a l’Università degli Studi di Torino que s’acupa de recercas sus l’auta Val Estura, en particular d’etno-linguistica.